സല്‍മാന്‍ ഖാന്റെ മുംബൈ വസതിക്ക് നേരെ നടന്ന വെടിവയ്പ്പ് ആസൂത്രണം ചെയ്തത് യുഎസില്‍ താമസിക്കുന്ന ഗുണ്ടാസംഘങ്ങള്‍. ഗുണ്ടാനേതാവ് ലോറന്‍സ് ബിഷ്ണോയിയുടെ ഇളയ സഹോദരന്‍ അന്‍മോല്‍ ബിഷ്ണോയി ഫെയ്സ്ബുക്ക് പോസ്റ്റില്‍ വെടിവയ്പ്പിന്റെ ഉത്തരവാദിത്തം ഏറ്റെടുത്തതിന് പിന്നാലെയാണ് ഇക്കാര്യം പുറത്തുവന്നത്. എന്നാല്‍ ഒരു വെര്‍ച്വല്‍ പ്രൈവറ്റ് നെറ്റ്വര്‍ക്ക് വഴി പങ്കിട്ട പോസ്റ്റിന്റെ ഐ.പി വിലാസം യുഎസിലെ കാലിഫോര്‍ണിയ ആണെന്നും ഉറവിടങ്ങള്‍ പറഞ്ഞു. 

ഗായകന്‍ സിദ്ധു മൂസവാലയുടെ കൊലപാതകത്തിനും മറ്റ് നിരവധി കുറ്റകൃത്യങ്ങളുമായി ബന്ധപ്പെട്ട് അന്വേഷിക്കുന്ന അന്‍മോല്‍ ബിഷ്ണോയ് മുമ്പ് വ്യാജ പാസ്പോര്‍ട്ടില്‍ ഒളിവില്‍ പോയ പ്രതിയാണ്. ഇയാളെ കൂടാതെ, കേസില്‍ യുഎസ് ആസ്ഥാനമായുള്ള മറ്റൊരു ഗുണ്ടാനേതാവുമുണ്ടെന്നാണ് വിലയിരുത്തല്‍. സ്രോതസ്സുകള്‍ അനുസരിച്ച് നിലവില്‍ യുഎസിലുള്ള ഗുണ്ടാനേതാവ് രോഹിത് ഗോദരയെ ഷൂട്ടര്‍മാരെ തിരഞ്ഞെടുക്കാന്‍ അന്‍മോല്‍ ബിഷ്ണോയി ചുമതലപ്പെടുത്തിയിട്ടുണ്ട്. ഒരു മാസം കൃത്യമായി ആസൂത്രണം ചെയ്തിരുന്നതായി അന്വേഷണ ഉദ്യോഗസ്ഥര്‍ കരുതുന്നു. മഹാരാഷ്ട്ര, ഡല്‍ഹി, രാജസ്ഥാന്‍, ഹരിയാന, പഞ്ചാബ് എന്നിവയുള്‍പ്പെടെ ഒന്നിലധികം സംസ്ഥാനങ്ങളില്‍ വ്യാപിച്ചുകിടക്കുന്ന ഗോദരയുടെ പ്രൊഫഷണല്‍ ഷൂട്ടര്‍മാരുടെ വിപുലമായ ശൃംഖല ഇതില്‍ ഉള്‍പ്പെട്ടിട്ടുണ്ടെന്ന് സംശയിക്കുന്നു.

ലോറന്‍സ് ബിഷ്ണോയിയുടെ അടുത്ത അനുയായിയായ ഗോദരയ്ക്ക് ഉന്നത കൊലപാതകങ്ങളില്‍ അടക്കം പങ്കുണ്ടെന്ന് വൃത്തങ്ങള്‍ പറഞ്ഞു. കര്‍ണി സേന തലവന്‍ സുഖ്ദേവ് സിംഗ് ഗോഗമേദിയെ കൊലപ്പെടുത്തിയതിലും ഗുണ്ടാസംഘം രാജു തേത്തിന്റെ കൊലപാതകത്തിലും ഇയാള്‍ ഉള്‍പ്പെട്ടിരുന്നു. ഈ കേസിലെ അക്രമികള്‍ക്ക് ഇയാളാണ് ആയുധങ്ങള്‍ എത്തിച്ച് നല്‍കിയിരുന്നത്. ലോറന്‍സ് ബിഷ്ണോയി സംഘം വിവിധ സംസ്ഥാനങ്ങളിലെ സഹായികളുടെ വീടുകളില്‍ ഒളിപ്പിച്ച ആയുധശേഖരങ്ങളുടെ ശൃംഖല പരിപാലിക്കുന്നതായി റിപ്പോര്‍ട്ടുണ്ട്. ഇത് ലൊക്കേഷനും പ്രവര്‍ത്തനവും അടിസ്ഥാനമാക്കി ഷൂട്ടര്‍മാര്‍ക്ക് ആയുധങ്ങള്‍ എളുപ്പത്തില്‍ കൈക്കലാക്കാന്‍ സഹായിക്കും. സല്‍മാന്‍ ഖാന്റെ വീടിന് പുറത്ത് വെടിയുതിര്‍ക്കാന്‍ ഉപയോഗിച്ച ആയുധങ്ങള്‍ ഈ ശൃംഖല വഴിയാണ് ഗോദര എത്തിച്ചതെന്ന് സംശയിക്കുന്നതായി വൃത്തങ്ങള്‍ അറിയിച്ചു.