തെരുവുനായയുടെ കടിയേറ്റ് മാരകമായി പരുക്കേറ്റ 12 കാരി മരിച്ചു. റാന്നി പെരുനാട് മന്ദപ്പുഴ ചേര്‍ത്തലപ്പടി ഷീനാഭവനില്‍ ഹരീഷിന്റെ മകള്‍ അഭിരാമിയാണ് മരിച്ചത്. കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയിലിരിക്കേയാണ് മരണം.
രണ്ടാഴ്ച മുന്‍പ് പാല്‍ വാങ്ങാന്‍ പോകുന്നതിനിടെയായിരുന്നു തെരുവുനായ കുട്ടിയെ കടിച്ചത്. കൈയിലും കാലിലും കണ്ണിന് താഴെയുമായി ഏഴിടത്താണ് കുട്ടിയെ നായ കടിച്ചത്. തുടര്‍ന്ന് പത്തനംതിട്ട ജനറല്‍ ആശുപത്രിയില്‍ പ്രവേശിപ്പിച്ച് കുട്ടിക്ക് പ്രതിരോധ വാക്‌സിന്‍ നല്‍കിയിരുന്നു. പേവിഷബാധയ്‌ക്കെതിരെ കുട്ടിക്ക് മൂന്ന് വാക്‌സിനാണ് നല്‍കിയത്.
വെള്ളിയാഴ്ച കുട്ടിയുടെ അവസ്ഥ ഗുരുതരമായതിനെ തുടര്‍ന്ന് പത്തനംതിട്ട ജനറല്‍ ആശുപത്രിയിലെത്തിച്ചെങ്കിലും പിന്നീട് കോട്ടയം മെഡിക്കല്‍ കോളേജിലേക്ക് മാറ്റുകയായിരുന്നു.
